Gipalig-on sa Cebu Provincial Government ang pagpatuman sa Suggested Retail Prices (SRP) sa mga palaliton sa tibuok probinsya tungod sa pagsaka sa presyo sa mga batakang produkto. Usa kini ka tubag sa epekto sa nagpadayon nga tensyon sa Middle East nga nakaapekto sa presyo sa merkado.
Kagahapon Abril 20, gilusad sa Capitol ang bag-ong online platform nga “Isumbong kay Gov” aron masayon sa mga katawhan ang pagsumbong sa overpriced nga mga baligya ug dili patas nga pamalakad sa merkado. Ang sistema gi-host pinaagi sa Google Forms ug direkta nga madawat ni Gobernador Pamela Baricuatro ang mga reklamo.
Tumong sa maong programa nga mapalig-on ang monitoring sa presyo ug masiguro nga magpabiling barato ang mga nag-unang panginahanglanon. Gipahigayon kini sa pakigtambayayong sa Department of Trade and Industry ug uban pang ahensya nga regular nagpagawas og SRP sa mga produkto.
Sa paggamit sa platform, kinahanglan maghatag og detalye ang mga mosumbong sama sa lugar, ngalan sa tindahan o merkado, ug hulagway sa problema sama sa taas nga presyo o dili maayong pamalakad sa tindero. Pwede usab mag-upload og mga litrato isip ebidensya aron mas dali ma-verify ang reklamo.
Gidasig sa Capitol ang publiko nga aktibong mogamit sa maong sistema, tungod kay ang partisipasyon sa katawhan makatabang sa gobyerno sa dali nga aksyon batok sa mga naglapas ug sa pagpanalipod sa konsyumer pinaagi sa patas nga presyo sa merkado.
Source: Cebu Province PIO
I via Renante Socia Lada