Gipanghimatuud sa Cebu Provincial Government ang dakong papel sa Department of Health (DOH) disease surveillance units sa pagpanalipod sa panglawas sa publiko ug mipasalig nga lig-onon pa ang panag-uban aron mas epektibong pag-alagad sa mga Sugboanon.
Sa iyang pamahayag atol sa unang Regional Epidemiology and Surveillance Unit (RESU) Awards Ceremony niadtong Miyerkules sa gabii, Agosto 20, giingon ni Capitol Piso Health Consultant Dr. Nikki Catalan nga gisiguro gyud ni Gobernadora Pamela Baricuatro nga walay Sugbuanon nga mabiyaan ilabi na kon hisgutan na ang panglawas.
Gipasidungog ni Dr. Catalan ang RESU ug tanang healthcare facilities nga nag-apil sa disease surveillance ug reporting tungod sa ilang padayon nga paningkamot sa pagmintinar sa public health safety pinaagi sa tukma ug hapsay nga impormasyon nga makatabang sa paspas nga pagtubag sa mga hulga sa panglawas.
Gipunting usab niya nga aron mahimong mas epektibo ang RESU, kinahanglan ang tabang ug suporta sa tanang stakeholders, ilabi na gikan sa gobyerno.
Tanang Capitol-run Provincial Hospitals nakadawat og Gold Awards alang sa epidemiologic ug disease surveillance. Matod ni Dr. Catalan, nagpasabot kini nga maayo na sila sa pagkolekta sa datos, apan ang sunod nga hagit mao ang paggamit niini aron mapalambo pa ang serbisyo medikal alang sa mga Sugboanon.
Source: Cebu Province PIO
I via Renante Socia Lada