Nasikop sa duha ka managlahing operasyon sa Police Regional Office 7 (PRO7) ang duha ka Most Wanted Persons sa rehiyon nga adunay kaso sa Statutory Rape niadtong Agosto 20, 2025.
Una nga nadakpan mao si Marvin, nga nailhan isip Top 10 Regional Most Wanted. Nasikop siya alas-8:55 sa gabii sa Barangay Looc, Lapu-Lapu City, human giserb ang warrant of arrest sa mga operatiba sa Police Station 3, Lapu-Lapu City Police Office. Ang maong warrant gipagawas ni Judge Jose Alfonso Malifer Gomos sa Family Court, Branch 5, Lapu-Lapu City. Walay girekomendar nga piyansa alang sa kaso nga iyang giatubang.
Sa laing bahin, nadakpan usab alas-6:30 sa gabii si alias Diosnie, nga sakop sa Top 4 Regional Most Wanted. Gidakop siya sa sulod mismo sa Carcar City Jail sa operasyon sa Carcar City Police Station uban sa Cebu Provincial Intelligence Unit ug RIU 7. Nag-atubang siya og tulo ka counts sa Statutory Rape ubos sa Article 266-A Paragraph 1 (D) sa R.A. 8353 nga giamendar sa R.A. 11648. Ang warrant of arrest gipagawas ni Judge Ernesto Engracia Narido sa Family Court, Branch 11, Carcar City, Cebu, ug sama sa una, walay girekomendar nga piyansa.
Subay sa balaod, ang bisan kinsa nga mapamatud-an nga nakasala sa Statutory Rape mahimong mahatagan og silot nga reclusion perpetua o life imprisonment, pinasikad sa Revised Penal Code nga giamendar sa R.A. 8353 ug R.A. 11648.
Ang duha ka suspetsado karon gitanggong ug gikatakdang ipresentar sa korte nga nagpagawas sa ilang warrant of arrest.
Matod pa ni PBGen Redrico A. Maranan, Regional Director sa PRO7, ang sunod-sunod nga pagdakop sa mga Most Wanted nagpakita nga seryoso ang kapulisan sa pagdakop sa mga kriminal.
Source: PRO7-PIO
I via Renante Socia Lada