Nagpagawas og pahimangno ang Cebu Provincial Tourism Office ngadto sa publiko bahin sa online booking scams nga nagkaylap karon sa Cebu. Sumala sa pahibalo, adunay mga manlimbong nga nagpakaaron-ingnon nga opisyal nga social media pages sa mga hotel, resort, ug uban pang establisemento sa turismo.
Gipahimangnoan ang mga biyahero nga mag-amping sa pag-book online ug siguruhon nga opisyal ug tinuod ang ilang ka-transaksiyon. Usa sa mga paagi aron malikayan ang scam mao ang pagtransak lamang sa Facebook-verified pages nga adunay blue checkmark.
Gidasig usab ang publiko nga susihon ang mga reviews ug komento, ug tan-awon ang opisyal nga website sa establisemento aron masiguro ang pagkalehitimo sa ilang booking. Kinahanglan usab magbantay sa paghatag og down payment ug likayan ang pagbayad og dugang nga bayad gawas sa opisyal nga pamaagi.
Kung adunay makit-an nga kadudahang account o kung adunay nabiktima na sa scam, gidasig sila nga dali i-report ang insidente sa Regional Anti-Cybercrime Unit (RACU)-7 pinaagi sa numero 0998-5988105.
Padayon nga gidasig sa Kapitolyo ang publiko nga magmatngon aron mapanalipdan ang ilang plano sa biyahe ug kuwarta. Mag-book og maalamon ug ayaw dayon pagtuo sa mga pahimulos nga sobra ka nindot aron tinuod.
Source: Cebu Province PIO
I via Renante Socia Lada