Gipasiugda ni Cebu Governor Pamela Baricuatro sa iyang administrasyon ang tin-aw ug limpyo nga pang-gobyerno ug pangdugay nga mga reporma atol sa pagbukas sa Cebu International Investment Summit 2026 (CIIS 2026) nga gipahigayon sa Capitol Social Hall niadtong Enero 12, 2026.
Matod sa gobernador, ang CIIS 2026 nagpakita sa bag-ong direksyon sa probinsya padulong sa open ug klarong pamaagi sa pamalaod, diin andam ang gobyerno sa pagtrabaho isip kauban sa mga mamuhunan ug dili babag. Iyang giingon nga ang tumong sa iyang administrasyon mao ang pagtukod og mga sistema nga molungtad bisan molabay na ang mga lider.
Ang upat ka adlaw nga summit, nga molungtad hangtod Enero 15, gi-organisar sa Cebu Provincial Investment and Promotions Office uban sa mga input ni Dr. Brian To, bana sa gobernador ug usa ka global strategist. Kapin sa 200 ka delegado lakip ang international investors, industry leaders, ug development partners ang mitambong sa kalihukan.
Gipadayag usab ni Gov. Baricuatro nga ang kusog ug kakugi sa mga Sugboanon mao ang pinakadakong bahandi sa probinsya. Matod niya, bisan pa sa kakulangan sa sistema kaniadto, ang mga Sugboanon maoy nagpadayon sa pagpauswag sa Cebu, ug karon responsibilidad sa gobyerno ang pagtukod og mga sistemang angay kanila.
Atol sa summit, gipaila-ila usab ang daghang oportunidad sa negosyo ug public-private partnerships aron makadani og dugang nga investments nga makahatag og trabaho ug dugay nga kaayohan sa probinsya. Tumong sa CIIS 2026 nga himuon ang Cebu isip usa ka lig-on ug kasaligan nga investment hub sa Asia-Pacific region.
Source: Cebu Province PIO
I via Renante Socia Lada