Nangandam na ang Cebu Provincial Government alang sa daghang mobiyahe karong Holy Week aron masiguro nga komportable ug luwas ang mga pasahero.
Sumala ni Gob. Pamela Baricuatro, gusto niya malikayan ang taas nga linya sa terminal sama sauna nga moabot pa sa dapit sa mall. Busa iyang gimando nga siguruhon ang kaharuhay sa mga pasahero ug dili sila maglisod.
Apil sa iyang direktiba ang 24/7 nga operasyon sa Cebu South Bus Terminal ug Cebu North Bus Terminal. Dugangan usab ang presensya sa kapulisan pinaagi sa koordinasyon kang PBGen. Redrico Maranan aron masiguro ang seguridad dili lang sa terminal kundi apil na sa mga pantalan.
Mobalik usab ang “Libreng Sakay” alang sa mga senior citizen, buntis, ug mga bata. Adunay andam nga mga bus sa matag terminal aron makatabang sa ilang biyahe.
Gipahibalo usab nga makigtambayayong ang probinsya sa Land Transportation Franchising and Regulatory Board aron makadugang og biyahe sa mga bus kung daghan na ang pasahero.
Ang mga empleyado sa terminal mag-duty 24 oras, ug siguruhon usab ang kalimpyo sa mga pasilidad. Magbutang usab og libreng tubig, medical stations, ambulansya, ug emergency responders.
Gipangayo usab sa gobernador ang tabang sa mga mayor aron ma-manage ang trapiko sa ilang lugar. Samtang gi-awhag ang publiko nga mag-segregate sa ilang basura aron mapadayon ang kalimpyo sa terminal.
Source: Cebu Province PIO
I via Renante Socia Lada