Naghiusa ang Police Regional Office 7 (PRO7) ug ubang ahensya sa gobyerno aron masiguro ang kaluwasan sa mga biyahero atol sa Semana Santa pinaagi sa programa nga “Oplan Biyaheng Ayos 2026.”
Gipahigayon ang launching sa programa sa Land Transportation Office sa Robinsons Galleria sa Cebu City karong Marso 25, 2026, diin mitambong ang mga opisyal sa lain-laing ahensya ug kapulisan.
Apil sa kalihokan ang pagpirma sa “Wall of Commitment for Safety,” nga simbolo sa panaghiusa sa gobyerno ug law enforcement aron maprotektahan ang mga biyahero ug masiguro ang kaluwasan sa dalan sa panahon sa Semana Santa.
Matud ni PBGEN. Redrico A. Maranan, andam na ang PRO7 sa pag-atubang sa daghang biyahero nga mopaingon sa mga probinsya, simbahan, ug mga tourist spots. Giingon niya nga gipahimutang na ang mga pulis sa mga terminal, dalan, ug ubang lugar nga daghang tawo aron motabang ug malikayan ang krimen.
Gipasiugda usab sa PRO7 ang istrikto nga pagpatuman sa balaod sa trapiko, sama sa inspeksyon sa sakyanan, pagbantay sa dalan, ug pagsilot sa mga driver nga reckless o nakainom og alkohol o drogas, subay sa Republic Act No. 10586.
Nagpasalig ang kapulisan nga pinaagi sa panagtinabangay sa mga ahensya, mas mapalig-on ang kaluwasan sa dalan ug masiguro nga luwas ang matag biyahe sa mga Pilipino niining Semana Santa.
Source: PRO7
I via Renante Socia Lada