Mipagawas og Executive Order si Cebu Governor Pamela Baricuatro nga nagpatuman og tibuok-probinsya nga plano para sa kahinlo ug hustong pagdumala sa basura, ug nagtukod usab og Provincial Solid Waste Management Board nga magbantay sa pagpatuman niini.
Ang Executive Order No. 3, Series of 2026, nga gipirmahan ni Gov. Baricuatro niadtong Enero 12, naghimong opisyal nga giya ang Provincial Cleanliness and Waste Management Plan sa tanang lungsod ug siyudad sa Cebu.
Sakop niini ang husto nga pagbulag sa basura, pagminus sa basura, pag-recycle ug composting, subay sa balaod ug konstitusyon sa nasud.
Tumong sa maong plano nga maminusan ang paglabay og basura bisan asa, mapanalipdan ang panglawas sa katawhan, ug masalbar ang baybayon ug kadagatan sa probinsya.
Giawhag usab ang tanang panimalay, negosyo, eskwelahan, simbahan ug organisasyon nga moapil sa mga kalihokan sa kahinlo.
Sulod sa unom hangtod dose ka bulan, gipaabot sa Kapitolyo nga makita dayon ang kausaban sama sa pagkunhod sa basura sa kadalanan, merkado, sapa, baybayon ug mga lugar nga pangturismo. Gimanduan usab ang tanang opisina sa gobyerno ug LGU nga strikto nga magpatuman sa waste segregation ug magpalihok sa ilang mga task force sa kahinlo.
Lakip usab sa mando ang paghimo og usa ka provincial dashboard diin makita sa publiko ang datos sa basura ug kahinlo gikan sa mga barangay, lungsod ug siyudad. Sa dugay-dugay nga plano, tumong sa probinsya nga maminusan pag-ayo ang basura, mosaka ang recycling ug composting, ug mas mailhan ang Cebu isip limpyo ug andam nga destinasyon sa turismo.
Aron masiguro ang hapsay nga pagpatuman, gitukod ang Provincial Solid Waste Management Board nga pangunahan sa gobernador o iyang representante, uban si Provincial Administrator Atty. Ace Durano isip bise tsirman.
Apil sa board ang tanang mayor, pipila ka opisina sa probinsya, mga representante sa distrito, pribadong sektor ug civil society. Ang Provincial Environment and Natural Resources Office ang magsilbi nga sekretariat sa board.
Source: Cebu Province PIO
I via Renante Socia Lada