Nangayo og tabang ang Bangko Sentral ng Pilipinas (BSP) kang Cebu Governor Pamela Baricuatro aron mapatuman ang Paleng-QR Ph Plus Program sa tibuok probinsya sa Cebu.
Ang Paleng-QR Ph usa ka hiniusang programa sa BSP ug Department of the Interior and Local Government (DILG) nga nagtumong nga palapdan ang paggamit sa cashless o digital nga pagbayad sa mga merkado ug sa lokal nga transportasyon sama sa tricycle.
Sumala ni BSP Central Visayas Director Anna Clara Oville, tumong sa programa nga madugangan ang mga tindahan ug drayber nga modawat og digital payments sa tanang siyudad ug lungsod sa nasud. Mas dali kini matuman kon adunay mga ordinansa ang lokal nga kagamhanan nga mosuporta sa programa.
Giabi-abi ni Gov. Baricuatro ang hangyo sa BSP ug mipahayag sa iyang bug-os nga suporta. Matud pa niya, andam ang probinsyal nga gobyerno nga motabang pinaagi sa executive order o usa ka probinsyal nga ordinansa.
Matud ni Gov. Baricuatro, padulong na sa digital ug cashless transactions ang Cebu. Apil na usab sa plano sa Kapitolyo ang pagbalhin sa bayranan sa mga bayad ug permits ngadto sa digital platforms.
Base sa datos sa BSP, hangtod Disyembre 31, 2025, kapin 37 ka probinsya na sa nasud ang niapil sa Paleng-QR Ph, uban ang 922 ka local government units nga aktibong nagpatuman sa programa.
Sa Cebu, una nang nisugod ang digital payments sa mga siyudad sa Cebu City, Mandaue ug Lapu-Lapu. Gisundan kini sa Danao City ug sa mga lungsod sa Pinamungajan, San Francisco, Tudela ug Poro.
Mipadayag si Gov. Baricuatro nga andam gyud motabang ang probinsya sa mga ahensya sa nasyonal nga gobyerno, ilabi na kon kini makatabang sa pagpasayon sa trabaho ug serbisyo sa katawhan.
Source: Cebu Province PIO
I via Renante Socia Lada