Gipahibalo ni Minglanilla Mayor Rajiv Enad nga nakadawat siya og suspension order kauban si Vice Mayor Lani Peña ug tanang mga konsehal nga nanerbisyo sa miaging termino, kagahapong adlawa Pebrero 2, 2026. Ang suspensyon naggikan sa usa ka kaso may kalabotan sa ilang desisyon bahin sa kahimtangan sa Sitio Napo, Barangay Guindarohan, diin naobserbahan ang mga liki sa yuta nga posibleng hinungdan sa landslide ug peligro sa mga residente.
Sumala ni Mayor Enad, ang ilang desisyon gihimo aron mapanalipdan ang katawhan sa maong lugar. Bisan pa man, miingon siya nga nasabtan niya nga makurat ang daghang Minglanillahanon sa maong kalamboan, apan kabahin daw kini sa kinabuhi sa public service ug politika.
Gipadayag sa mayor nga gitahod niya ang Office of the Ombudsman ug ang proseso sa balaod, ug gamiton nila ang tanang legal nga paagi nga anaa aron deoensagan ang ilang kahimtang. Tungod sa suspensyon, dili siya makabalik sa iyang opisina sulod sa usa ka tuig.
Samtang wala pa siya, matud pa ni Enad nga subay sa balaod, si First Councilor Lheslen Enad maoy molihok isip mayor, samtang si Councilor Mulot Laput ang molihok isip vice mayor. Ang tanang pwesto sa konseho magpabiling bakante sulod sa usa ka tuig gawas kon adunay lain nga legal nga lakang.
Gisulti usab ni Mayor Enad nga bisan pa sa nahitabo, magpabilin siyang lig-on sa iyang baruganan nga unahon ang kaluwasan ug kaayohan sa katawhan sa Minglanilla, ug mobalik siya human sa suspensyon aron ipadayon ang iyang serbisyo sa lungsod.
Source: Rajiv Enad
I via Renante Socia Lada