Nagpahigayon og panihapon sa pasalamat ang Cebu Provincial Government alang sa mga medical ug non-medical personnel sa Rotary Club of Cebu Port Centre ug Unite for Good didto sa Cebu Provincial Capitol niadtong Marso 19.
Kini human sa malampusong 21st Rotaplast International Cebu Medical Mission nga gihimo sulod sa usa ka semana sa Adventist Hospital Cebu.
Sa maong medical mission, nakahimo ang grupo og 84 ka operasyon sa mga batang adunay cleft lip ug cleft palate. Kadaghanan sa mga benepisyaryo mga bata gikan sa nagkalain-laing lugar—43 gikan sa probinsya sa Sugbo, 11 sa Cebu City, pito sa Lapu-Lapu City, tulo sa Mandaue City, ug 20 gikan sa ubang lugar gawas sa Sugbo.
Mainiton nga gidawat ang mga bisita pinaagi sa sayaw nga presentasyon sa Lapu-Lapu Performing Arts group, ug gisundan kini og paglibot sa mga pasilidad sa Kapitolyo.
Sumala sa grupo, ang ilang misyon mao ang “saving smiles, changing lives,” diin naghatag sila og paglaum ug bag-ong kinabuhi sa mga bata ug ilang pamilya pinaagi sa programang “Libreng Opera sa mga Bungi.”
Sa mensahe ni Gobernador Pamela Baricuatro, iyang gipadayag ang dako nga pasalamat sa tanang volunteers ug partners tungod sa ilang dedikasyon ug serbisyo alang sa mga Sugboanon.
Source: Cebu Province PIO
I via Renante Socia Lada