Nagpadayon ang Cebu City Government sa paghatag og oportunidad sa mga senior citizens, human 257 ka aplikante ang miapil sa screening alang sa part-time nga trabaho isip service crew niadtong Marso 21.
Human sa orientation sayo sa semana, ang mga kwalipikadong aplikante gi-interview ug gi-assess aron masuta kung angayan ba sila sa programa. Daghan sa mga senior ang sayo nga miadto, naglaum nga mapili ug makatrabaho.
Ang maong programa gipangunahan sa Department of Manpower Development and Placement (DMDP) ug bukas alang sa mga residente sa Cebu City nga edad 60 hangtod 65 anyos, basta lig-on pa sa panglawas ug kompleto ang dokumento. Libre usab ang medical requirements nga ipahigayon sa Cebu City Medical Center aron matabangan ang mga aplikante.
Gikan sa tanang aplikante, 102 ka senior citizens ang pilion ug i-assign sa lain-laing fast food establishments sa siyudad. Ang matag mapili magtrabaho sulod sa lima ka bulan, upat ka oras matag adlaw, lima ka adlaw sa usa ka semana, ug makadawat og sweldo base sa minimum wage.
Sumala ni Mayor Nestor Archival, kabahin kini sa tumong sa siyudad nga matabangan ang tanang sektor, apil na ang mga tigulang, aron magpabiling aktibo ug produktibo.
Nagpasalig usab ang Cebu City Government nga padayon nilang suportahan ang mga aplikante ug maghimo pa og dugang programa para sa kaayohan sa komunidad.
Source: Cebu City PIO
I via Renante Socia Lada