Nagpahigayon og unom ka adlaw nga training ang Cebu Provincial Anti-Drug Abuse Office (CPADAD) aron matudluan ang mga doktor kung unsaon sayo pag-ila ug pagtabang sa mga tawo nga naay problema sa ilegal nga drogas.
Ang maong training gihimo gikan Marso 15 hangtod 20 sa usa ka hotel sa Cebu City, ug gitambongan sa mga municipal health officers, hospital chiefs, ug uban pang medical partners.
Ang focus sa programa mao ang Screening, Brief Intervention and Referral to Treatment (SBIRT), usa ka pamaagi nga makatabang sa mga doktor sa sayong pag-detect sa drug use, paghatag og hustong tambag, ug pag-refer sa pasyente sa angay nga treatment o rehabilitasyon.
Sumala ni Dr. Nikki Catalan, health consultant sa Kapitolyo, ang problema sa drogas dili lang isyu sa kapulisan kundili usa usab ka seryosong problema sa panglawas nga nakaapekto sa pamilya ug komunidad.
Giingon usab niya nga mas sayo nga aksyon, mas daghang kinabuhi ang maluwas. Gipasiugda niya nga kinahanglan mausab ang pamaagi gikan sa puro enforcement ngadto sa pag-ayo, gikan sa paghukom ngadto sa pagsuporta, ug gikan sa kalisod ngadto sa recovery.
Ang SBIRT kabahin sa mas dako nga plano sa administrasyon ni Gobernador Pamela Baricuatro aron masulbad ang drug dependency pinaagi sa health-based approach. Tumong sa probinsya nga ipatuman kini sa tanang lokal nga panggamhanan.
Apil sa ubang lakang sa gobyerno ang istrikto nga drug-free workplace policy ug ang pag-abli sa New Life Cebu Drug Rehabilitation Center sa umaabot.
Nagpasalamat si Dr. Catalan sa Department of Health, CPADAD, ug sa tanang partners nga mitabang sa maong training, ug giingnan ang mga doktor nga sila maoy naa sa frontlines sa pakigbatok batok sa problema sa drogas.
Source: Cebu Province PIO
I via Renante Socia Lada