Nalipay ug nabati ang kahupayan ni Cebu Governor Pamela Baricuatro human nagsugod na gyud og distribusyon sa ₱10,000 housing assistance gikan sa National Housing Authority (NHA) para sa mga biktima sa Super Typhoon Odette, upat ka tuig human sa trahedya niadtong 2021. Mitambong ang governor sa Barangay Poblacion Gym sa Carcar City kagahapon Disyembre 12 aron masaksihan ang unang batch sa mga benepisyaryo ubos sa pagpanguna ni NHA Regional Manager Hermes Jude Juntilo.
Matod sa governor, dako iyang pasalamat nga natuman na ang dugay nang gihuwat sa katawhan. Ubos sa Emergency Housing Assistance Program (EHAP), makadawat og ₱10,000 ang mga kwalipikadong panimalay nga nabiktima og maayo o natotal damage ang ilang balay. Ang Carcar City maoy unang LGU sa Cebu nga nakadawat sa tabang human sila maoy unang natapos sa validation sa lista sa mga benepisyaryo.
Gidawat sa mga opisyales sa Carcar City, nga gipangulohan nila Mayor Patrick Barcenas ug Vice Mayor Perkins de Dios, ang governor uban sa mga representante sa DSWD ug OCD. Nahinumduman nga ang NHA kaniadto mi-allocate og ₱742 milyon para sa mga biktima sa Odette, apan nauli kini sa National Treasury tungod sa laing pagsabot tali sa NHA ug sa nangagi nga provincial administration. Aron matul-id ang nahitabo, paspas nga gihimo ni Gov. Baricuatro ang paghangyo nga ibalik ang pondo.
Niadtong Nobyembre 18, nagpadala si Gov. Baricuatro og sulat kang NHA General Manager Joeben Tai aron i-reallocate ang pondo. Pipila lang ka adlaw human niini, gisulti ni Tai nga gisugo ni President Ferdinand Marcos Jr. nga i-release ang pondo karong buwana.
Ang pagpagawas sa dugay nang nalangay nga tabang usa ka dakong kadaugan para sa probinsya. Uban sa pagsugod sa distribusyon, nakahimo ang Capitol sa usa ka dakong lakang aron matabangan ang liboan ka pamilya sa Cebu nga hangtod karon naningkamot pa sa hingpit nga pagbangon gikan sa kadaut nga gihasol sa Super Typhoon Odette.
Source: Cebu Province PIO
I via Renante Socia Lada