Gidili ni Cebu Gov. Pamela Baricuatro sulod sa 45 ka adlaw ang pagpasulod sa buhi nga baboy, karne sa baboy, ug ubang produktong baboy gikan sa Negros Island ug ubang mga lugar nga adunay African Swine Fever (ASF).
Ang tumong sa maong mando mao ang pagpanalipod sa Cebu aron dili matakdan sa ASF ug mapadayon nga luwas ang industriya sa pag-uma og baboy sa probinsya.
Nagsugod dayon ang pagpatuman sa maong mando ug mahimo pa kining palugwayan kung magpadayon ang ASF sa ubang lugar.
Gisugo usab ang mga mag-uuma og baboy nga mas hugtan ang kalimpyo ug seguridad sa ilang mga umahan aron malikayan ang pagsulod sa sakit.
Ang mga awtoridad sa mga pantalan, tugpahanan, ug ubang agianan gimandoan nga hugtan ang inspeksyon. Ang mga gidili nga kargamento sakmiton ug adunay silot ang mga molapas sa balaod.
Sumala sa Provincial Veterinary Office, hangtod karon wala pay kaso sa ASF sa Cebu. Busa, kinahanglan nga bantayan pag-ayo ang tanang agianan aron mapadayon nga luwas ang probinsya gikan sa maong sakit.
I via Renante Socia Lada