Kapin sa 900 ka mga residente ang naapektuhan human nasunog ang daghang kabalayan sa Sitio Silangan, Barangay Tejero sa Cebu City niadtong Sabado sa gabii, Mayo 16, 2026.
Base sa ulahing report sa mga otoridad alas 12:40 sa kadlawon, mokabat sa 134 ka balay ang naapektuhan sa sunog. Ning maong panghitabo, 120 ka balay ang totally nga nasunog samtang 14 ka balay ang partially damaged.
Sumala sa report, 247 ka pamilya o dul-an sa 945 ka indibidwal ang nawad-an sa ilang pinuy-anan tungod sa insidente. Lakip sa naapektuhan ang 71 ka sharers, 40 ka renters ug 11 ka lodgers.
Gituohang nagsugod ang sunog alas 7:05 sa gabii. Mibisita usab si Cebu City Mayor Nestor Archival sa lugar aron susihon ang sitwasyon ug bantayan ang relief operations kauban ang Department of Social Welfare Services.
Sa pagkakaron, gipapuyo ang mga biktima sa Tejero Elementary School Gym nga gihimong evacuation center. Nagpadayon usab ang Cebu City Government sa pagparehistro sa mga internally displaced persons o IDPs ug paghatag og init nga pagkaon sa mga apektadong pamilya.
Matud pa sa mga otoridad, ipadayon pa ang validation ug verification sa mga naapektuhan sa ikaduhang adlaw human sa insidente. Girekomendar usab ang paghatag og pinansyal nga ayuda, relief goods, housing materials, bugas ug uban pang pagkaon alang sa mga biktima sa sunog.
Source: Cebu City PIO
I via Renante Socia Lada