Naghiusa ang Cebu City uban sa nagkalain-laing komunidad sa kalibutan sa pagsaulog sa International AIDS Candlelight Memorial niadtong Huwebes sa gabii, Mayo 15, 2026. Ang kalihokan gipasiugdahan sa Cebu City Health Department ug sa Social Hygiene Clinic ubos sa dakbayan sa Sugbo.
Gisugdan ang programa pinaagi sa usa ka misa aron sa paghatag og higayon sa pagpamalandong ug pag-ampo alang sa mga naapektuhan sa HIV/AIDS. Human niini, nagtigom ang mga partisipante aron sa pagpahinumdom sa mga nangamatay tungod sa maong sakit ug sa pagpakita sa ilang suporta sa pagbatok sa diskriminasyon ug stigma.
Usa sa labing makahuluganon nga bahin sa programa mao ang “Lighting of the 7 Pillars and HIV Ribbon,” diin nagsiga og kandila isip simbolo sa paglaum, panaghiusa, ug padayon nga pakigbatok batok sa HIV/AIDS. Ang maong seremonya usa usab ka paagi sa paghatag og pasidungog sa mga nawad-an og kinabuhi tungod sa epidemya.
Ang International AIDS Candlelight Memorial gisaulog matag ikatulong Domingo sa Mayo ug giila isip usa sa labing dugay nga grassroots mobilization sa kalibutan. Nagsugod kini niadtong 1983 ug hangtod karon nagpadayon isip simbolo sa panaghiusa ug pag-awhag sa komunidad nga tapuson ang HIV/AIDS epidemic.
Sumala sa mga opisyal, padayon ang serbisyo sa Social Hygiene Clinic sa paghatag og HIV testing, counseling, ug treatment support alang sa mga residente. Giawhag usab nila ang publiko nga magpa-test, mahibalo sa ilang kahimtang, ug motabang sa pagtangtang sa stigma batok sa HIV/AIDS.
I via Renante Socia Lada