Matod sa Police Regional Office 7 (PRO7) nga kapin 5,600 ka mga wanted persons ang nadakpan sa tibuok Central Visayas atol sa tuig 2025, isip resulta sa ilang gpalig-on nga manhunt operations.
Gikan Enero 1 hangtod Disyembre 31, 2025, adunay 5,687 ka operasyon nga gihimo sa kapulisan. Tungod niini, 4,620 ka ordinary wanted persons ug 1,032 ka most wanted persons ang nadakpan. Apil niini ang 273 regional, 381 provincial, 80 city, 284 municipal, ug 14 station-level nga mga most wanted.
Matod ni PRO7 Regional Director PBGen Redrico A. Maranan, nahimo kini tungod sa hugot nga koordinasyon sa hudikatura, hapsay nga pag-verify sa mga warrant of arrest, maayong pagbinayloay sa intelihensiya, ug labi na ang tabang sa komunidad nga naghatag og tukmang impormasyon sa kapulisan.
Sumala pa niya, ang matag pagdakop nagpasabot sa dedikasyon sa PRO7 sa pagpatuman sa balaod, pagpanalipod sa katawhan, ug pagsiguro nga ang mga naglapas sa balaod maatubang ang hustisya.
Gisiguro usab sa PRO7 nga ipadayon ang manhunt operations sa 2026 aron mapadayon ang kalinaw ug kahapsay sa tibuok Central Visayas.
Source: PRO7 PIO
I via Renante Socia Lada