Walay na-rekord nga indiscriminate firing, walay stray bullet victims, ug walay namatay tungod sa pabutok atol sa pagsaulog sa year-end celebration sa tibuok Central Visayas, sumala sa Police Regional Office 7 (PRO7).
Matud pa sa PRO7, tungod kini sa kusog ug istrikto nga presensya sa kapulisan sa rehiyon. Gisunod pag-ayo ang mando sa PNP Chief, PLTGEN Jose Melencio Nartatez Jr., ilabi na ang One-Strike Policy, nga nagpasabot nga walay mulapas ug daling silutan ang bisan kinsa nga makalapas sa balaod.
Gipatuman sa PRO7 ang polisiya pinaagi sa pagpahigayon og patrol, dugang nga police visibility, ug aktibong deployment sa mga pulis gikan sa regional headquarters hangtod sa matag police station. Tungod niini, napugngan ang pag-abuso sa pusil ug napalig-on ang disiplina sa kapulisan ug sa katawhan.
Tungod sa padayon nga pagbantay ug paspas nga aksyon, walay natalang biktima sa stray bullet atol sa selebrasyon. Nagpasabot kini nga epektibo ang sayong pahimangno, padayon nga monitoring, ug andam nga response sa mga awtoridad.
Dugang pa, gikan Disyembre 31, 2025 hangtod Enero 1, 2026, walay namatay tungod sa mga insidente sa pabuto. Kini tungod sa istrikto nga pagbantay sa paggamit sa pabuto, pagdakop sa mga bawal nga fireworks, ug hugot nga koordinasyon sa mga LGU ug uban pang ahensya.
Matud ni PBGen Redrico A. Maranan, Regional Director sa PRO7, resulta kini sa hugot nga liderato ug disiplinado nga pagpatuman sa mga mando sa nasudnong pamunuan. Iyang giingon nga klaro ug istrikto nga gisunod ang One-Strike Policy, ug klaro usab ang mensahe nga dili tugotan ang bisan unsang buhat nga makapiligro sa kinabuhi sa katawhan.
Source: PRO7 PIO
I via Renante Socia Lada