Sa paningkamot sa lokal nga panggamhanan nga masulbad ang dugay nang isyu sa mga informal settlers, mipagawas og klarong pamahayag ang Housing and Urban Development Office (HUDO) sa Mandaue City kabahin sa ilang mga plano alang sa long-term nga solusyon, atol kini sa programa nga Tandem Express nga gidumala nila ni Renante Lada ug Ting Joe Pepito, karong adlawa.
Gipangulohan ni HUDO Head Ramy Inopiquez, uban ang Assistant Head nga si Noel Trocio, ug uban pang mga opisyal nga sila Cyril Navales ug Alvin Fajardo, ang presentasyon sa plano nga magsiguro nga makab-ot ang panginahanglan sa housing sa siyudad. Gisuportahan kini sa administrasyon nila Mayor Jonkie Ouano ug Congresswoman Emmarie “Lolypop” Ouano-Dizon.
Gipadayag ni Inopiquez nga usa sa ilang dakong tumong mao ang paghatag og desenteng kapuy-an sa kapin 14,000 ka informal settlers nga kasamtangang nanimuyo sa peligroso o dili legal nga mga luna. Ang proyekto nanganyo og suporta sa mga stakeholders, nasudnong panggamhanan aron masiguro ang kalampusan niini.
Dugang pa, giplanohan usab sa city government ang mga programa sa livelihood o panginabuhian alang sa mga benepisyaryo, aron dili lang sila matabangan sa housing, kundi matabangan usab nga makabarog sa ilang kaugalingong panginabuhian.
Ang adbokasiya sa kasamtangang administrasyon nasandig sa panlantaw sa ilang mga ginikanan nga unang miserbisyo sa Mandaue City. Gisiguro sa HUDO nga kini nga mga lakang magpadayon nga transparent ug inclusive, alang sa mas luwas ug progresibong komunidad.
I via Renante Socia Lada ug Ting Joe Pepito
#rpndykccebu