Ilawom sa aktibong pagpangulo ni Acting City Director, PCOL Enrico E. Figueroa, ang Cebu City Police Office (CCPO) misalmot og dakong kalampusan sa ilang lig-on nga kampanya batok sa krimen, nga naglakip sa pagsakmit sa kapin ₱2 milyon nga gibana-bana’ng shabu ug pagdakop sa 94 ka mga suspetsado sa nagkalain-laing ilegal nga kalihokan.
Ang mga operasyon kabahin sa lapad nga inisyatiba nga nakasentro sa direktiba ni PBGEN Redrico A. Maranan, Regional Director sa Police Regional Office 7 (PRO7), nga nagtumong sa pagpalig-on sa serbisyo sa kapulisan ug pagpamenos sa krimen sa syudad.
Gipahigayon ang operasyon gikan Mayo 23 hangtod 29, 2025, nga misangpot sa mga mosunod nga kalampusan:
Sa 57 ka operasyon, nasakmit sa kapulisan ang gituohang ilegal nga drogas nga nagkantidad og ₱2,098,956. Kini usa ka timaan sa padayon nga paningkamot sa CCPO sa pagbungkag sa drug trade sa syudad.
Tulo (3) ka indibidwal ang nadakpan tungod sa kalambigitan sa ilegal nga sugal.
Pito (7) ka pusil nga walay rehistro ang nasakmit atol sa operasyon, nga dakong tabang aron masiguro ang kalinaw ug kasigurohan sa komunidad.
Gawas sa mga nadakpan nga may kalambigitan sa ilegal nga drogas ug armas, baynte (20) ka wanted persons usab ang nasikop atol sa operasyon, usa ka ebidensya sa determinasyon sa CCPO sa pagpatuman sa hustisya.
Matod sa CCPO, magpadayon ang ilang proactive nga mga operasyon aron pugngan ang krimen, pasig-uli ang kahapsay, ug mapalig-on ang kasigurohan sa katawhan sa Cebu City.
Source: CCPO
I via Renante Socia Lada