Usa ka dakong kadaugan batok sa kriminalidad ang nakuha sa Police Regional Office 7 (PRO7) human madakpi ang 2,817 ka wanted persons, lakip na ang 410 ka most wanted individuals, sulod sa lima ka buwan nga manhunt operation gikan Enero 1 hangtod Mayo 31, 2025.
Pinaagi sa 2,826 ka high-impact tracker operations, nakab-ot sa PRO7 ang pagdakop sa mga pugante nga dugay nang naglikay sa balaod. Sa nadakpan, 93 ang most wanted sa rehiyonal nga lebel, 157 sa probinsyal, 44 sa siyudad, 110 sa munisipyo, ug 6 sa istasyon.
Gawas sa mga most wanted, 2,407 pa ka laing indibidwal nga may kasong kriminal ang nadakpan atol sa gipakusgang kampanya.
Matod ni PBGEN Redrico A. Maranan, Regional Director sa PRO7, kini nga kalampusan dakong tampo sa tinguha nga magpabilin ang kalinaw ug seguridad sa Central Visayas.
Iyang gipasalig ang padayon nga dedikasyon sa PRO7 sa epektibo ug tinuoray nga pagpatuman sa balaod, ug nag-awhag sa publiko nga magpabiling mabinantayon ug mosuporta sa kampanya kontra krimen.
Ang maong kalampusan gisundan sa laing report nga halos ₱495 milyon nga kantidad sa ilegal nga drogas ang nasakmit sa PRO7 ug 3,948 ka drug suspects ang nadakpan sa parehas nga panahon, usa ka klarong timaan sa bug-os nga kampanya sa rehiyon aron limpyohan ang komunidad gikan sa ilegal nga drogas ug mga pugante.
Source: PRO7