Cebu City – Tugtan sa Cebu City Government ang pagpahigayon ug State of the Nation Address (SONA)-related rallies sa syudad karong Lunes, Hulyo 25, 2022, basta lang maka kuha sila ug permit gikan sa kagamhanan sa syudad.
Nagkanayon si Cebu City Mayor Michael Rama nga iyang gi recognize ang katungod sa pagpahigayon ug peaceable assembly nga gilatid sa Philippine Constitution.
Hinoon, gikinahanglan niini nga mokuha ug permits gikan sa syudad pagsiguro sa public safety ug protection atol sa pagpahigayon sa giplano nga protesta.
Alang ni Rama nga way problema ang syudad sa pag issue ug permits ngadto sa mga cause-oriented groups, kinsa naglaraw ug demonstrasyon sa adlawng Lunes.
“I think, constitutionally, naa may democratic process ana. Dili man na nimo maignore, but definitely ma-involved jud na ang police, ang CITOM (Cebu City Traffic Operations Management), kay dili na basta basta kay naa may ginganlan nga constitutional provision and naa say local government–will bring the mayor in charge for purposes of police powers and safety and security,” mensahi ni Rama.
“Ang pinaka importante nato, we will not be getting into surprises,” dugang sa mayor.
Gitakda nga moluwat si Presidente Ferdinand Marcos sa iyang unang SONA sa adlawng Lunes, Hulyo 25, 2022.
Sa ilang bahin ang Cebu City Police Office mopaubos sa Full Alert Status sa syudad atol sa maong kalihukan.
Ilang gipasalig ang maximum tolerance ngadto sa mga ralleyista. (Jhon Tadlip)
(News & photo courtesy of Office the Mayor-Cebu City)