Mangnamnama ni Gob. Mathew Marcos Manotoc nga umadu pay dagiti maited a tulong kadagiti mannalon, mangngalap ken agtartaraken iti dingwen.
Kuna ti gobernador a daytoy met iti tarigagay ken plano ni Pres. Ferdinand Bongbong Marcos a nangiwanwan iti Dept. of Agriculture ti naan anay a mangtulong kadagiti mannalon.
Kuna pay ti gobernador a daytoy ti maysa kadagiti ipangpangruna ti presidente iti pannakaipaay ti atension iti sektor ti agrikultura tapno umadu ti produksion iti baet ti agpangpangta a global food Crisis.
Inpalgak ni gobernador Marcos nga umun una iti listaan ni Pres. BBM ti Ilocos Norte kadagiti maipamaysa a matulungan.
Immun una ngem iti daytoy, indaulwan ti gobernador iti pannakaibunong dagiti naruay a farm machineries kadagiti nagduduma nga asosasion, fuel subsidy vouchers ken tilapia fingerlings kadagiti mannalon ken mangngalap ditoy Ilocos Norte.
Iti nasao a distribusion, inatendaran met ni Regional Executive Director Nestor Domenden iti Dept. of Agriculture ken dadduma pay nga opisial kadagiti maseknan nga opisina iti gobierno probinsial ken naawis a maseknan a bisita.
Maibilang kadagiti naibunong ket harvester tractor ken dadduma pay a ramit ti panagtalon nga inted ti DA malaksid pay iti tilapia fingerlings ken fuel subsidy nga inted met ti gobierno probinsial. (Cheena Arzadon)
(Source: Provincial Government of Ilocos Norte)