Atol sa panagtapok sa mga sakop sa Organization of Socialized and Economic Housing Developers of the Philippines (OSHDP) sa Cebu Country Club niadtong niaging gabii, si Cebu City mayor Mike Rama ug Bise Mayor Raymond Alvin Garcia nangagni og mga developr nga mutukod og medium-rise building alang sa socialized housing sa siyudad sa Sugbo.
Naglaum si Rama nga duna pay laing mobarog nga MRB isip pagtuman sa developers sa socialized housing nga balaod sama sa gihimo sa Cebu Landmasters, Inc. nga nagtukod og duha a MRB sa Barangay Lorega-San Miguel nga ubay-ubay ka mga beneficiaries ang nakapahimulos niini.
Nagpapanumpa usab ang Mayor sa mga nanambong sa maong tigom nga moduyog kaniya sa iyang gilantaw ug tinguha nga makab-ot sa iyang administrasyon ang damgo nga mahisusama sa Singapore ang dakbayan sa Sugbo.
Nibutyag usab si Bise Mayor Garcia kanila nga anhi sa dakbayan motukod sa ilang socialized housing ang mga developers pinaagi sa paghimo og MRBs tungod kay 90 porsiyento sa mga lumulopyo anaa sa urban nga bahin sa siyudad.
Gikalipay kini pag ayo sa Mayor ug Besi Mayor kay mao na unya kini ang katumanan ug kasulbaran sa dugay na nga problema sa informal settlers.
Dako usab kini nga tabang sa mga wala pay mga pinuy-anan kay makabaton na unya sila og desinte nga pinuy-anan ug usa pud kini ka lakang aron ang Dakbayn sa Sugbo ma susama sa Singapore. (Renante Lada)
(News & photo courtesy of Cebu City News & Information)