Malamposong mi-gradwar ang 21 ka mga “Balay Silangan” Housemates kaganihang buntag, Oktubre 12, 2022, pinaagi sa usa ka “Graduation Ceremony” nga gihimo sa kagamhanang lokal ning siyudad, pinaagi ni Balay Silangan Manager, Ms. Flora Atamosa.
Ang maong kalihokan ang didto gipahigayon sa 2nd floor, Commercial Building B, sa Dipolog Boulevard, dinhi sa dakbayan.
Sigun sa nasayran, nga ang 21 ka mga housemates gikan sa Balay Silangan ning siyudad ang mi-gradwar human sila naka-kumpleto sa ilang mga tulumanon ug rekesitos nga gitakda dinha sa ilang pagpa-ilawom sa “reformatory period” isip mga drug offenders, kinsa mitugyan sa ilang mga kaugalingon alang sa pagbag-o, ilawom sa programa sa atong kagamhanan.
Kining nasangpit nga housemates maoy unang batch nga nakapahimulos sa serbisyo sa atong Balay Silangan, sukad ang maong edipisyo ang gi-establisar niadtong Oktubre 7, sa nakalabay nga tuig alang sa maong katuyu-an.
Ning maong kalamboan, mipa-abot sa iyang pahalipay si City Mayor Darel Uy ngadto sa mga graduates tungod sa ilang na-abot nga kalamposan nunot sa ilang tinguha sa pagbag-o, uban sa pag-awhag kanila nga mopuyo pagbalik sa normal nga panginabuhi uban sa ilang mga pamilya ug dili na mobalik sa na-andang bisyo nga maoy makaguba sa ilang mga kaugmaon.
(Source: Dipolog City Government Facebook page)
