Mogasto ang kagamhanan sa Dakbayan sa Sugbo sa tanang balayranan alang sa pagpahiluna sa tulo ka mga bata nga namatay sa sunog sa Sitio Mabapo, Avocado St., Brgy. Mambaling kagahapon sa buntag sa Marso 29, 2025.
Ang mga biktima, nga nag-edad og 6, 4, ug 3 anyos, nasunogan samtang wala ang ilang mga ginikanan sa balay. Matod sa imbestigasyon, anaa sa trabaho ang ilang inahan nga si Ynica Marie Siaboc, samtang ang ilang amahan nga si Lerio Abella milakaw aron sugaton kini.
Si Mayor Raymond Alvin Garcia, uban ni Konsehal Joel Garganera, personal nga miadto sa maong dapit ug nagmando nga motabang ang City Hall sa mga apektadong pamilya.
Nagtoo ang kabomberohan sa Cebu City Fire Station nga posibling nagdula og posporo ang mga bata samtang sila ra ang nabilin sa ilang balay.
Sa nasayran nga miabot sa 14 ka balay, 35 ka pamilya ug 151 ka residente ang apiktado niini sa sunog nga adunay danyos nga P750,000.
Kanunay usab nag awhag ang kabomberohan nga kanunay mag amping dili lang sa bulan sa Fire Prevention Month apan sa matag adlaw. (Renante Socia Lada)
(Source: Cebu City PIO)