Usa ka joint operation sa Police Regional Office 7 (PRO7) ug Bureau of Internal Revenue (BIR) ang misangpot sa pagkasakmit sa kapin ₱20 milyon nga kantidad sa smuggled nga sigarilyo sa Mandaue City niadtong Marso 26, 2025.
Gipasiugda sa mga otoridad ang pagsusi sa pipila ka mga lokasyon sa Brgy. Guizo, Mandaue City, lakip ang Espina Compound, Sitio Sta. Cruz, ug A.S. Fortuna Extension kanto A. Del Rosario Street. Kini nga operasyon gihimo base sa nakuhang kasayuran nga gilangkuban sa nagkalain-laing police units, sama sa Regional Intelligence Division 7, Regional Special Project Unit 7, Cebu City Police Office, Mandaue City Police Office, ug Regional Mobile Force Battalion 7.
Sa maong operasyon, nadakpan ang duha ka suspetsado ug nakmsakmit ang 334 ka master cases ug 167,765 ka pakete sa smuggled nga sigarilyo, dugang sa lima ka kahon nga adunay 2,500 ka pakete. Ang kinatibuk-ang kantidad sa nakumpiska nga kontrabando gibanabanang Php20,431,800.
Apil sa mga brand nga narekober sa operasyon mao ang Alpen Green, Champion Green, United Menthol Green, Victor Agila Menthol Green, Trojen Green, Rosean Gold, Alpha Red, ug D and J Premium.
“This operation decisively addresses the escalating threat of smuggling, which undermines legitimate businesses and poses a serious risk to public health. We are committed to safeguarding our communities and strengthening the integrity of our economy,” segon ni PBGen Redrico Maranan, Regional Director of PRO7.
Ang mga nadakpan ug nasakmit nga ebidensya gidala sa buhatan sa RSPU7 alang sa tukma nga pagproseso. Ang mga suspetsado mag-atubang og kasong may kalabutan sa Republic Act 10863 o Customs Modernization and Tariff Act.
Nagpadayon ang mga otoridad sa ilang lig-on nga kampanya batok sa pagpangsmuggle sa rehiyon, gamit ang intelihensya ug koordinasyon aron mapugngan ang ilegal nga kalihukan sa pangnegosyo. (Renante Socia Lada)
(Source: PRO-7)