Naigo og sunog ang usa ka lugar sa Sitio Panganiban Street, Barangay Pahina Central niadtong Abril 18, 2026, nga nakaapekto sa 26 ka pamilya o kapin 90 ka indibidwal.
Base sa inisyal nga imbestigasyon, 10 ka balay ang naapektuhan. Pito ang totally nga nasunog, usa ang partially damaged, ug usa pa ang gamay ra ang kadaot. Lakip sa naapektuhan ang siyam ka pamilya nga renter, siyam ka sharers, duha ka lodgers, ug usa ka tag-iya nga wala didto nagpuyo.
Dali nga mitubag ang Cebu City Government pinaagi sa ilang emergency response teams. Ilang gilista ang mga biktima ug internally displaced persons (IDPs), samtang nagpadayon pa ang pag-verify sa tanang apektadong pamilya. Naghatag usab sila og init nga pagkaon nga ipadayon sulod sa tulo ka adlaw aron matabangan ang mga naapektuhan.
Sa pagkakaron, ang tanang biktima gipapuyo sa evacuation center nga nahimutang sa Regino Elementary School.
Girekomendar usab ang paghatag og pinansyal nga tabang aron makatabang sa ilang pagbangon. Lakip sa gisugyot nga ayuda mao ang ₱20,000 alang sa mga pamilya nga totally ug partially damaged ang balay, ₱10,000 para sa renters ug sharers, ug ₱5,000 para sa lodgers ug absentee owners.
Dugang pa niini, girekomendar usab ang paghatag og relief goods, housing materials, bugas, ug uban pang kinahanglanon aron makatabang sa pag-recover sa mga biktima.
Padayon ang lihok sa Cebu City Government aron masiguro nga matabangan dayon ang tanang naapektuhan ug magiyahan sila sa ilang pagbangon gikan sa maong kalamidad.
Source: Cebu City PIO
I via Renante Socia Lada