Sa press conference kagahapon Abril 20, 2026, gipahibalo ni Cebu City Mayor Nestor Archival ang kahimtang sa pagpangandam sa dakbayan alang sa umaabot nga ASEAN Summit sa Mayo 7–8. Bisan og sa Mactan ipahigayon ang kadaghanan sa kalihokan, nag-andam gihapon ang Cebu City ilabina sa SRP, CCLEX ug NuStar area. Nakab-ot na sa siyudad ang 70% hangtod 90% nga kahinlo, apan giila nga hagit ang abog tungod sa uga nga panahon. Wala usab planong suspensyon ang klase.
Gihisgutan usab ang problema sa kalidad sa hangin. Sumala sa mayor, nakaapekto niini ang abog, kakulang sa hangin nga mo-circulate, aso sa sakyanan, ug open burning. Gisugdan sa syudad ang mas istriktong pagpatuman batok sa pagsunog sa basura ug gi-activate ang Barangay Environmental Officers. Gidasig ang publiko nga magsul-ob og mask, likayan ang dili importante nga lakaw, ug magbantay sa hustong paglabay sa basura.
Sa laing bahin, gihisgutan ang four-day work week nga gi-pilot sulod sa duha ka semana. Nakita nga mikunhod ang konsumo sa kuryente, tubig ug gasolina. Apan hulaton pa ang kumpletong report ug feedback sa publiko sa dili pa desisyunan kung ipadayon ba kini. Padayon usab ang kampanya sa kahinlo ug waste management, diin labaw sa 200 ka street cleaners ang gi-deploy matag adlaw ug gipadayon ang waste segregation ug recycling programs.
Gipunting usab ang problema sa tubig ug agrikultura tungod sa init nga panahon. Nagpadayon ang rehabilitasyon sa kapin 500 ka artesian wells ug pagbutang og water filtration systems sa lain-laing lugar. Gisuportahan usab ang mga mag-uuma pinaagi sa “Tabo sa Barangay” ug Grocery Caravan. Samtang, giplano usab ang fuel subsidy alang sa mga drayber nga posibleng ipatuman sa ikaduhang semana sa Mayo.
Sa katapusan, giingon ni Mayor Archival nga magpadayon ang siyudad sa pagpalambo sa imprastruktura, traffic management, ug safety measures sama sa pagbutang og CCTV sa flyovers. Nangayo usab og dugang pondo ang syudad alang sa basura, tubig, ug fuel subsidy. Gipasiugda niya nga importante ang kooperasyon sa publiko aron mapadayon ang kalimpyo, kaluwasan, ug kalamboan sa Cebu City.
Source: Cebu City PIO
I via Renante Socia Lada