Maglusad ang Cebu Provincial Government sa “Tabang Pambyahe” program aron motabang sa plite sa mga pasahero ug mapalambo ang transportasyon, ilabi na karon nga nisaka ang presyo sa gasolina.
Sumala ni Gobernadora Pamela Baricuatro, tumong sa programa nga matabangan ang mga commuter ug mga drayber pinaagi sa paghatag og subsidy. Tungod niini, madugangan ang biyahe sa mga bus aron mas dali ug mas komportable ang pagsakay sa publiko.
Giaprubahan sa Department of Transportation (DOTr) ang P20 milyon nga pondo para sa maong programa. Sugdan kini sa mga pilot route gikan sa Cebu South Bus Terminal padulong Sibonga, ug gikan IT Park padulong Danao City, sugod karong Semana Santa.
Sa ilawom sa programa, mas daghan ang biyahe kada adlaw ug target nga adunay bus matag 15 minutos sa matag hunongan. Ang mga pasahero kinahanglan mosakay ug manaog sa tukmang bus stop lamang. Ang mga drayber usab makadawat og dugang subsidy, samtang ang mga bus kinahanglan adunay CCTV ug GPS aron masiguro ang maayong pagpatuman sa programa.
Source: Cebu Province PIO
I via Renante Socia Lada