Nangandam na karon ang kagamhanan sa siyudad sa Sugbo para mutabang sa mga biktima sa pagbuto sa bulkang Kanlaon didto sa Isla sa Negros, niadtong Hunyo 3, 2024, sa gabii.
Si Cebu City Acting Mayor Raymond Alvin Garcia nimando karon ni Harold Alcontin, ang labaw sa Cebu City Disaster Risk Reduction and Management Office (CCDRRMO), nga magpadala og team ngadto sa Negros aron magsusi ug maoy morekomendar kung unsa ang angay nga tabang ang itunol sa dakbayan sa Sugbo.
“This morning ako nang gitawagan si Harold Alcontin, who is the head of our disaster (office) and I have instructed him already to bring bisa’g one team there to look into how we can help and then he’s going to report to me in the upcoming days,” segon ni Acting Mayor Garcia.
Dali usab nagpatawag og panagtigom si Alcontin sa iyang mga sakop aron pangandaman ang pag adto sa Canlaon.
“Ako gi-suggest nga ang akong ipadala ang rescue team, QRT (Quick Response Team), composed of medical, rescue, and evacuation team nga trained gyud sila. Ang akoang core group, together with the operations (team), nag-select na sila og tawo. I think mga seven to 10-man team nga mapadala nato ngadto with the equipment unsay pwede,” pamahayag ni Alcontin.
Gitataw ni Alcontin isip pahinomdum sa publiko nga ang abo nga binuga sa nibutong bulkan posibling maabot sa Sugbo apan usab ra ang kahigayunan depindi lang kini kung mag habagat.
Nakig alayon usab ang CCDRRMO sa Sugbo ngadto sa lokal na kagamhanan sa siyudad sa Canlaon aron makapadala na sila og tabang sa mga apiktadong residenti sa maong lugar.
Andam gyud ta kay mao man gyud na ang kinaiya sa Cebu City, motabang gyud. Lipay kaayo si Mayor (Raymond) Alvin (Garcia) nga ako siyang ma-inform dayon kay aron makaandam pod ta dayon og unsay mga kinahanglan ngado sa Canlaon. Ingon gyud siya nga ‘motabang ta, Harold. Motabang ta,” dugang ni Alcontin.
Samtang sa laing bahin gipaubos na usab sa kagamhanan sa dakbayan sa Canlaon ang ilang lugar sa state of calamity. (Renante Socia Lada)
(Source: Cebu City PIO)