Nakalas ang usa ka Job Order (J.O.) employee sa Cebu City Hall human kini gipusil sa sulod mismo sa ilang balay sa Barangay Suba Pasil niadtong Lunes sa gabii, Agosto 4, 2025.
Ang biktima giila sa Cebu City Police Office, nga mao si Roldan Delima Minguito, 46 anyos, nga gi-assign sa Cebu City Zoo, gipusil makadaghan sa ulo pag-abot sa ilang balay pasado alas-8 sa gabii. Sumala sa imbestigasyon, gisundan siya sa suspetsado hangtod sa ilang tugkaran ug gipusil gamit ang short firearm.
Ang panghitabo nakita mismo sa usa sa iyang mga anak, samtang ang suspetsado misakay dayon sa usa ka blue Yamaha Aerox human sa pagpamusil.
Kini nga kaso gikuhaan og laing anggulo karon sa kapulisan, human masuta nga ang biktima daw nakadawat og hulga gikan sa bana sa babaye nga giingong adunay relasyon niya. Tungod niini, ang mga imbestigador naglantaw sa posibilidad nga ang personal nga isyu, partikular ang love triangle, maoy nagtulod sa brutal nga krimen.
Samtang padayon ang imbestigasyon, nagpabiling gipaubos sa monitoring ang giingong bana sa Plaza Housing nga posible kuno nga aduna’y kalabutan sa hitabo. Ang pamilya ni Minguito nanawagan sa hustisya, samtang ang dakbayan misaad nga tabangan ang tibuok proseso sa pag-ila ug pagsikop sa suspetsado.
I via Renante Socia Lada