Ang kasinatian nga gituyo unta nga relaxing break human sa klase, naundang sa posas ug kaso human madakpan ang duha ka Grade 11 students nga managhigala nga naggamit og marijuana sa daplin sa usa ka unibersidad sa J. Alcantara Street, Barangay Sambag 1 niadtong Agosto 5, 2025.
Ang mga menor de edad nga nailhan lamang sa alyas nga “Rocky”, 16 anyos, ug “Lalen”, 18 anyos, pulos estudyante sa senior high school, gisikop sa mga sakop sa Station Drug Enforcement Unit (SDEU) sa Abellana Police Station human naaktuhang naggamit sa iligal nga drogas.
Gikumpirmar sa kapulisan nga nakuhaan ang duha og duha ka linikit nga marijuana ug usa ka lighter nga gituohang gigamit sa hitabo. Matod sa duha, nahagit lang sila ug niingon nga panagsa ra kini mahitabo, ug gihatag namang daw sa mga estambay sa ilang smoking area.
Apan alang sa mga awtoridad, ang “panagsa ra” dili makatarungan ug adunay legal nga sangputanan. Ang duha karon giandaman na og kaso ilawom sa Section 11 ug 12 sa RA 9165 o Comprehensive Dangerous Drugs Act of 2002.
Gipahimangnoan sa kapulisan ang kabatan-onan nga ang pagbinuang sa drogas, bisan pa sa tinguha nga makarelax, mahimong mosangpot sa kadaut nga magpabilin sa ilang kinabuhi ug kaugmaon.
I via Renante Socia Lada