Gidayeg ni Cebu Governor Pamela Baricuatro ang joint operatives sa PDEA Region 7, Cebu Police Provincial Office (CPPO), Naval Forces Central, ug Coast Guard Central District Office sa ilang “excellent achievement” human madakpan ang usa ka high-profile drug personality ug nasakmit ang 8 kilo nga shabu nga nagkantidad og ₱54.4 milyon.
Ang buy-bust operation nahitabo niadtong Martes sa gabii, Enero 13, 2026, sa Sitio Suba, Barangay Tuyan, City of Naga, Cebu. Matod pa ni Gov. Baricuatro, “It has always been my stand against illegal drugs—there should be no illegal drug operations in the Province of Cebu. Ang akong directive nila is padayon sa pag-gukod aning mga illegal drug operators diri sa Probinsya sa Sugbo.
Ang primary target sa operasyon giila isip alias Clifford, 47 anyos, usa ka driver ug residente sa South Poblacion, Naga City. Nadakpan usab ang iyang tulo ka kauban: Maricel, 39 anyos, walay trabaho, Barangay Tuyan, Naga City; alias Joseph, 52 anyos, driver, Barangay Looc, Mandaue City; ug alias Barbara, 29 anyos, online seller, Barangay Umapad, Mandaue City.
Nasikop sa operasyon ang 8 ka pakete sa shabu nga gibug-aton og 8,000 grams, buy-bust money, daghang ATM ug ID cards, 7 ka cellphone, ug usa ka sakyanang 4-wheels. Matod sa balaod, ang pagbaligya bisan gamay nga kantidad sa shabu usa ka non-bailable offense nga silotan og life imprisonment ug multa nga ₱500,000 hangtod ₱10 milyon.
Sumala sa PDEA-7 Acting Assistant Regional Director Thessa Tiuzen, si Clifford gi-klasipikar isip “national wholesaler” nga allegedly nagkuha og illegal drugs gikan sa Metro Manila ug Mindanao.
Giingon usab ni CPPO Director Col. Abubakar Mangelen Jr. nga ang grupo ni Clifford organized apan independent, ug padayon ang follow-up operations aron maputol ang ilang operasyon.
Gipahimangno sa mga awtoridad nga padayon ang monitoring sa mga pantalan tungod kay posibleng gamiton kini isip transshipment points sa drogas.
Source: Cebu Province PIO
I via Renante Socia Lada