Andam na ang Cebu City Police Office (CCPO) alang sa “Dagan Bayanihan” Fun Run nga ipahigayon sa Nobyembre 29, 2025, alas-4 sa kadlawon sa Cebu Business Park. Ang maong kalihokan adunay tulo ka kategoriya — 4 km, 8 km, ug 12 km — ug abli para sa tanang gusto moapil, lakip ang mga mahiligon sa dagan ug mga miyembro sa komunidad.
Gipahigayon sa CCPO ang usa ka press conference karong Oktubre 30, 2025 sa Golden Prince Hotel and Suites, diin daghang mga tigbalita ang mitambong aron masayran ang detalye sa kalihokan.
Ang “Dagan Bayanihan” usa ka inisyatiba sa CCPO Advisory Group nga gipangulohan ni Mrs. Marlinda Angbetic-Tan, uban sa CPSMU ug sa pagdumala ni PCOL Enrico Evangelista Figueroa, Acting City Director sa CCPO.
Ang makolektang pondo gikan sa maong fun run gamiton aron masuportahan ang pag-operate sa CCPO Command Center, usa ka modernong pasilidad nga magpalig-on sa sistema sa pagbantay ug pag-monitor sa seguridad sa dakbayan. Kini nga proyekto nagpakita sa padayon nga paningkamot sa CCPO nga magamit ang teknolohiya aron mapalambo ang public safety ug epektibong pagpatuman sa kalinaw sa Cebu City.
Pwede magparehistro onsite sa tanang police stations sa ilawom sa CCPO, o pinaagi sa CCPO City Advisory Group Facebook account alang sa dugang impormasyon sa registration.
Padayon ang CCPO sa pagpalig-on sa partnership sa komunidad pinaagi sa mga kalihokan nga nag-awhag sa aktibong partisipasyon, kahimsog sa lawas, ug responsableng pagkahiusa sa pagpanalipod sa kalinaw ug kahusay.
Gisiguro usab sa CCPO nga hugot nga ipatuman ang mga lakang sa seguridad sa tibuok kalihokan aron masiguro ang kaluwasan ug kasadya sa tanang moapil.
Nagpasalamat usab ang CCPO sa tanang partner agencies, organizers, sponsors, ug mga supporters nga mitabang aron mahimong malampuson ang “Dagan Bayanihan” Fun Run.
Source: CCPO
I via Renante Socia Lada