Nadakpan sa kapulisan ang usa ka 38 anyos nga lalaki nga gituohang nagbuhat og ilegal nga armas atol sa dakong operasyon batok sa loose firearms nga gihimo sa Cebu Police Provincial Office sa Danao City, Cebu.
Ang operasyon gipahigayon gikan alas 11:35 sa gabii niadtong Mayo 16 hangtod alas 5:00 sa buntag sa Mayo 17, 2026 sa Sitio Gondayan, Barangay Masaba, Danao City.
Nagtinabangay sa operasyon ang Provincial Intelligence Unit ug ang Danao City Police Station pinaagi sa pagserbisyo og search warrant tungod sa paglapas sa Republic Act 10591 o Comprehensive Firearms and Ammunition Regulation Act.
Sa operasyon, narekober sa mga pulis ang tulo ka shotgun, usa ka kalibre .45 nga pistola, mga bala, magasin sa pusil, ug daghang kagamitan nga gigamit sa paghimo og armas sama sa welding machine, hand drill, steel plates ug uban pang firearm parts.
Base sa imbestigasyon, gituohang ilegal nga paghimo og armas ang nag-unang panginabuhian sa suspek. Hapsay ug malinawon usab nga nahuman ang operasyon atubangan sa mga barangay official ug sa suspek samtang gigamit sa mga pulis ang alternative recording devices isip puli sa body-worn cameras.
Gidayeg ni Cebu PPO Provincial Director PCOL Abubakar Udang Mangelen Jr. ang mga operatiba sa ilang malampusong operasyon ug giingong padayon nilang pakusgon ang kampanya batok sa loose firearms ug kriminalidad aron mapadayon ang kalinaw ug kaluwasan sa Sugbo.
I via Renante Socia Lada