Padayon ang gipakusog nga operasyon sa Cebu Police Provincial Office ubos sa “Safer Cities Initiative” diin 608 ka mga tawo ang nadakpan tungod sa nagkalain-laing paglapas sa ordinansa sa tibuok lalawigan sa Sugbo niadtong Mayo 16, 2026.
Kabahin kini sa implementasyon sa OPLAN Bulabog, OPLAN Sita, ug Night Watch nga tumong sa pagpalig-on sa disiplina, pagdugang sa presensya sa kapulisan, ug pagpugong sa kriminalidad sa komunidad. Sa report sa kapulisan, 248 ka operasyon ang gihimo sa nagkalain-laing lungsod ug siyudad sa lalawigan.
Base sa datos, kadaghanan sa mga nakalapas mao ang traffic ordinances nga niabot sa 323 ka kaso. Gisundan kini sa pag-inom sa publikong lugar nga adunay 118 ka kaso, paglapas sa curfew sa mga menor de edad nga adunay 84 ka kaso, panigarilyo sa publikong lugar nga adunay 33 ka kaso, ug paglaag nga walay tarong nga sanina nga adunay 28 ka kaso. Aduna sab mga nadakpan tungod sa sobra oras nga karaoke ug uban pang lokal nga ordinansa.
Sa 608 ka mga nadakpan, 279 kanila gipahimangnoan ug gibuhian, samtang kapin ₱196,000 nga multa ang gipataw sumala sa lokal nga mga ordinansa. Lakip sa mga siyudad nga adunay pinakadaghan nga violators mao ang Naga City nga adunay 48, gisundan sa Toledo City nga adunay 44 ug Carcar City nga adunay 40. Sa mga lungsod, nanguna ang Liloan nga adunay 41 ka violators.
Matod ni PCOL Abubakar Udang Mangelen Jr., dako og tabang ang hugot nga pagpatuman sa ordinansa aron malikayan ang krimen ug mapabilin ang kalinaw sa komunidad. Gidayeg usab ni PBGEN Arnold Evangelista Abad ug Gob. Pamela Baricuatro ang padayon nga paningkamot sa kapulisan sa pagmintinar sa kahapsay ug kaluwasan sa Sugbo.
📸 CPPO
I via Renante Socia Lada