Nagpulong ang mga department heads ug representante sa nagkalain-laing opisina sa Cebu Provincial Capitol niadtong Biyernes, Mayo 15, 2026, aron hisgutan ug pinal nga repasohon ang bag-ong proseso sa pag-avail sa “Assistance to Individuals in Crisis Situations” o AICS program sa probinsiya.
Tumong sa bag-ong sistema nga mapadali ang proseso gikan sa paghangyo sa tabang hangtod sa pag-release sa ayuda sulod na lamang sa 21 ka working days. Mas paspas kini kumpara kaniadto nga moabot pa og usa ka bulan ug kinahanglan pa mag-follow up ang mga aplikante sa ilang hangyo.
Ang AICS sa Cebu Provincial Government usa ka programa nga naghatag og temporaryo ug dali nga tabang sa mga residente nga nakaagian og kalisod sama sa sakit, kamatayon sa pamilya, o kakulang sa pang-eskwela. Lahi kini sa AICS program sa Department of Social Welfare and Development o DSWD kay ang programa sa Capitol pondo mismo sa probinsiya.
Ang programa gidumala sa Provincial Social Welfare and Development Office o PSWDO ug alang kini sa mga kabos nga residente sa probinsiya sa Sugbo, gawas sa mga nagpuyo sa highly urbanized cities sama sa Cebu City ug Lapu-Lapu City.
Lakip sa mahimong ma-avail nga tabang ang medical assistance alang sa hospital, tambal ug laboratoryo; burial assistance para sa lubong; educational assistance alang sa eskwelahan; ug uban pang tabang sama sa plete, food aid ug psychosocial support.
Kinahanglan lamang nga makahatag ang aplikante og certificate of indigency, valid ID ug uban pang dokumento depende sa klase sa ayuda nga gi-avail.
Matud pa sa Capitol, kabahin kini sa tinguha ni Governor Pamela S. Baricuatro nga mapalambo ang serbisyo sa gobyerno pinaagi sa mas transparent, organisado ug paspas nga proseso alang sa kaayohan sa mga Sugboanon.
I via Renante Socia Lada