Nasikop sa kapulisan sa Balamban ang usa ka wanted person human sa armadong komprontasyon atol sa pagsilbi sa warrant of arrest sa Barangay Biasong, Balamban, Cebu sa Mayo 17, 2026. Ang suspek usa ka 27-anyos nga lalaki nga gipangita sa kaso nga Qualified Theft ug adunay piyansang ₱40,000.
Sumala sa report, pag-abot sa mga operatiba sa lugar aron ipatuman ang warrant, ilang gipaila ang ilang kaugalingon ug gipahibalo ang katuyoan sa operasyon. Apan kalit kunong napusil ang mga kauban sa suspek, lakip ang iyang igsoon.
Tungod sa engkwentro, nadakpan ang subject sa warrant ug usa pa ka suspek samtang usa pa nila ang nakalingkawas ug padayon pang gipangita sa mga otoridad. Usa usab ka pulis ang nasamdan apan anaa na karon sa maayo nga kahimtang.
Sa pagproseso sa crime scene, narekober sa SOCO ang usa ka kalibre .45 nga pistola nga adunay mga bala ug duha ka sachet sa gidudahang shabu nga mokabat og 10 gramos ug gibanabana’g kantidad nga ₱68,000.
Nakuha usab ang uban pang ebidensya sama sa cellphone, holster, gloves, ID ug kuwarta.
Ang usa sa mga suspek nga naangol sa pinusilay gidala dayon sa Cebu Provincial Hospital-Balamban apan gideklara nga patay sa doktor.
Samtang, padayon ang follow-up operation sa kapulisan aron madakpan ang usa pa ka suspek nga nakagawas sa insidente.
I via Renante Socia Lada