Gipahibalo sa Police Regional Office 7 (PRO7) ang pagdakop sa ika-upat nga suspetsado sa pagpanulis nga nahitabo sa usa ka pampublikong eskwelahan sa Barangay Antipolo, Medellin, Cebu, kadlawon sa Hulyo 15, 2025.
Ang suspetsado, usa ka 23-anyos nga lalaki, nadakpan sa iyang balay sa samang barangay niadtong Hulyo 16 atol sa follow-up operation nga gipangulohan ni PMAJ Ian T. Macatangay sa Medellin Municipal Police Station.
Niadtong Hulyo 15, 2025, tulo ka mga suspetsado ang nadakpan sa drone-assisted hot pursuit operation sa mismong adlaw sa insidente.
Nasayran usab sa imbestigasyon nga usa sa unang nadakpan nga suspetsado adunay existing nga warrant of arrest tungod sa kalapasan sa Sections 5 ug 11, Article II sa RA 9165 o Comprehensive Dangerous Drugs Act of 2002. Ang mando sa pagdakop gipagula ni Hon. Samson Troy Kintanar Layese, Presiding Judge sa RTC Branch 78, Bogo City, Cebu niadtong Setyembre 27, 2024.
Gidayeg ni PBGen Redrico A. Maranan, Regional Director sa PRO7, ang kusog ug walay undang nga paningkamot sa Medellin Police Station.
Ang tanang nadakpan karon gibutang sa kustodiya sa Medellin Municipal Police Station samtang giandam ang mga dokumento alang sa pagpasaka sa kaso sa korte. Ang mga ebidensya nga nakuha sa operasyon gisumite na sa Forensic Unit aron susihon kung gigamit ba kini sa ubang mga krimen sa rehiyon.
Source: PRO7
I via Renante Socia Lada