Usa ka High-Value Individual (HVI) nga giila nga nalambigit sa ilegal nga drogas ang nadakpan sa usa ka buy-bust operation nga gihimo sa Bogo City Police Station sa Barangay Sto. Rosario, Bogo City sayong buntag sa Hunyo 27, 2026. Sa operasyon, nasakmit ang kapin 115 gramos nga gidudahang shabu nga adunay gibanabang kantidad nga ₱782,000.
Gipahigayon ang operasyon sa mga sakop sa Intelligence Unit ug City Drug Enforcement Unit (CDEU) sa Bogo City Police Station uban sa koordinasyon sa Philippine Drug Enforcement Agency (PDEA-7). Nadakpan ang target human kini gipasanginlang namaligya og shabu ngadto sa usa ka police poseur-buyer. Duha pa ka ubang suspek nga naa sa lugar ang gidakop usab human makuhaan og dugang gidudahang shabu ang usa kanila.
Sumala sa kapulisan, ilang narekober ang usa ka sachet sa shabu nga gibaligya sa poseur-buyer, 34 pa ka sachet gikan sa pangunahing suspek, ug duha pa ka sachet gikan sa laing nadakpan. Nasakmit usab ang buy-bust money, ₱16,363 nga gidudahang halin sa ilegal nga drogas, ug mga sudlanan nga gituohang gigamit sa pagtago sa drogas.
Sa inisyal nga imbestigasyon, nasayran nga ang HVI dugay nang gipasanginlang nag-apod-apod og ilegal nga drogas sa Bogo City ug kasikbit nga mga lugar, maong nahimo siyang prayoridad nga target sa kapulisan. Ang tulo ka nadakpan anaa na karon sa kustodiya sa Bogo City Police Station ug atubangon ang kasong paglapas sa Sections 5 ug 11 sa Republic Act 9165 o Comprehensive Dangerous Drugs Act of 2002.
Gidayeg ni PCOL Abubakar Udang Mangelen Jr., Provincial Director sa Cebu Police Provincial Office, ang mga operatiba sa ilang malampusong operasyon.
Matud niya, padayon nga palig-onon sa kapulisan ang ilang kampanya batok sa ilegal nga drogas pinaagi sa intelligence-driven operations ug pakigtambayayong sa PDEA aron maprotektahan ang mga Sugboanon ug mapadayon ang kalinaw ug kaluwasan sa komunidad.
📸 CPPO
I via Renante Socia Lada