Nasikop sa kapulisan ang usa ka armadong lalaki sa Barangay Sambag 2, Cebu City, sa gabii sa Hunyo 26, 2026, tungod sa ilegal nga pagbaton og pusil ug bala nga supak sa Republic Act 10591 o Comprehensive Firearms and Ammunition Regulation Act.
Sumala sa Cebu City Police Office (CCPO), nagsugod ang operasyon human makadawat og sumbong gikan sa usa ka concerned citizen bahin sa usa ka armadong tawo nga nagtambay sa maong lugar.
Dihang napamatud-an sa mga pulis ang report, ilang giadto ang lugar ug ilang nailhan ang suspetsado base sa gihatag nga deskripsyon.
Sa pagduol sa kapulisan, nasakpan ang suspetsado nga nagkupot og usa ka pusil apan napakyas kini sa pagpakita og legal nga mga dokumento nga nagtugot kaniya sa pagbaton niini ug sa mga bala. Tungod niini, gidakop dayon siya sa mga otoridad.
Narekober gikan sa suspetsado ang usa ka Taurus 9mm revolver ug duha ka buhing bala sa 9mm. Gidala siya sa Police Station 2 diin nagpabilin siyang gitanggong samtang giandam ang mga kasong ipasaka batok kaniya.
Matud pa sa CCPO, ang paspas nga paglihok sa kapulisan nakatabang sa pagpugong sa posibleng krimen ug sa pagmintinar sa kalinaw ug kaluwasan sa komunidad sa Cebu City.
📸 CCPO
I via Renante Socia Lada