Padayon ang kampanya sa Cebu Police Provincial Office (CPPO) aron mapalig-on ang kalinaw ug kahapsay sa tibuok lalawigan pinaagi sa Safer Cities Initiative. kagahapon Hunyo 26, nadakpan ang 364 ka mga tawo tungod sa paglapas sa nagkalain-laing lokal nga ordinansa.
Sumala sa CPPO, adunay 227 ka police operations nga gipahigayon sa nagkalain-laing lungsod ug siyudad sa lalawigan. Kadaghanan sa mga nalapas mao ang traffic ordinance nga adunay 192 ka kaso. Nadakpan usab ang 68 ka tawo nga nag-inom sa pampublikong lugar, 49 ka menor de edad nga nakalapas sa curfew, 28 ka naglakaw nga walay sanina sa ibabaw sa lawas, 19 ka nanigarilyo sa publiko, ug 8 ka nakalapas sa oras sa paggamit sa karaoke.
Sa kinatibuk-an, 192 ka mga nakalapas ang gipamulta, samtang 172 ang gipahimangnoan ug gipagawas, subay sa lokal nga ordinansa. Mokabat sa ₱74,800 ang nakolektang multa gikan sa operasyon.
Matod ni Cebu PPO Provincial Director PCOL Abubakar Udang Mangelen Jr., ang tumong sa kampanya mao ang pagpalig-on sa disiplina ug pagpugong sa mga panghitabo nga mahimong mosangpot sa krimen. Pinaagi sa padayon nga presensya sa kapulisan ug patas nga pagpatuman sa balaod, gitinguha nilang magpabiling malinawon ug luwas ang tanang komunidad sa Cebu.
Gidayeg usab ni Governor Pamela Baricuatro ug ni PBGEN Arnold Evangelista Abad ang paningkamot sa CPPO. Ilang gipasiugda nga magpadayon ang lig-on nga panagtinabangay sa kapulisan, lokal nga panggamhanan, ug komunidad aron masiguro ang kalinaw, kahapsay, ug kaluwasan sa tibuok lalawigan sa Cebu.
📸 CPPO
I via Renante Socia Lada