Wala nay kinabuhi nga napalgan ang usa ka habal-habal driver nga adunay samad dinunggaban sa lawas.
Napalgan kini pasado 1:00 kaganihang kadlawon, Marso 2,2023, didto sa Sitio Manlubong, Barangay Ipil, Lungsod sa Carmen, Probinsya sa Sugbo.
Ang biktima giila sa Carmen Police Station nga mao si Guilbert Albaño Basan 41 anyos ang panuigon, menyo, habal-habal driver ug residenti rapud sa maong lugar.
Sa pasiunang imbestigasyon sa kapulisan nasayran nga paingon mupauli ang biktima sa ilang pinuy-anan apan giatangan kini ug gidunggab patay.
Adunay samad dinunggaban sa wala nga bahin sa lawas ang biktima nga maoy hinungdan sa kamatayon niini.
Si Basan bag-o lang nakadawat og P24,000 nga gikan sa iyang asawa nga usa ka OFW.
Nahanaw na usab ang kwarta nga gidala sa biktima atol sa maong krimin.
Sa pagkakaron tulis ang gisubay nga motibo sa maong krimin ug padayon pa usab nilang gipalawman ang imbestigasyon aron maila ang mamumuno. (Renante Lada, photo courtesy of Carmen Police Station)