Gipahibalo sa University of Cebu (UC) ug TESDA nga nagbukas sila og 2,645 ka full scholarship slots alang sa mga gusto moskwela og 3-year diploma sa Hospitality Management o Tourism Management—total nga libre, walay bayad bisan gamay. Ang programa ubos sa Universal Access to Quality Tertiary Education Act nagtumong sa pagtabang sa kabatan-onan nga dili naka-padayon sa eskwela tungod sa kakulang sa kwarta.
Si UC Chairman Atty. Augusto W. Go mismo ang nag-announce sa mao nga scholarship nga giaprubahan ni TESDA Director General Jose Francisco “Kiko” Benitez, pinaagi sa TESDA Central Visayas. Aron mas daghan ang maabot nga estudyante, nangayo og tabang ang UC sa Cebu Provincial Government sa pagpakaylap sa impormasyon pinaagi sa LGUs ug mga barangay.
Miadtog Capitol ang team sa UC nga gipangulohan nila Dr. Dennis Samar ug Capt. Gerry Enjambre, uban sa marketing director nga si Cerwin Eviota, aron opisyal nga mangayo og suporta sa probinsya sa pagpahibalo sa scholarship. Gitambongan sila sa mga opisyal sa probinsya niadtong Huwebes, Disyembre 12, 2025.
Gipa-extend sab sa UC ang enrollment gikan Disyembre 13 hangtod Disyembre 29, 2025 aron mas daghan pa ang maka-enroll bisan nagsugod na ang klase karong Lunes, Disyembre 15. Matod sa UC, mas daghan ang makabenepisyo sa extension ug sa tabang sa probinsya.
Ang scholars makadawat og free tuition sulod sa 3 ka tuig, libre nga textbooks ug learning materials, TESDA National Assessment (NC II hangtod NC IV), ug ₱14,000 nga allowance matag semester. Gidugang pa ni Dr. Samar nga ₱45,000 matag semester ang ihatag nga suporta gawas pa sa allowance.
Ang mga interesado pwede moadto direkta sa UC-METC Study Hall sa Barangay Mambaling ug dad-on ang mga requirements sama sa PSA birth certificate, 1Ă—1 ID picture, Form 137, Good Moral, honorable dismissal ug registration form nga ihatag sa enrollment. Bukas kini sa tanan SHS graduates, old curriculum graduates, ALS passers, ug college undergrads/transferees.
Para sa pangutana, tawag sa 0969-510-1500, 410-8811 local 5147 / 5151, o email sa ucmetc.tetac@gmail.com.
Source: Cebu Province PIO
I via Renante Socia Lada