Gipirmahan ni Cebu Governor Pamela Baricuatro ang Executive Order No. 37 nga nagmugna sa Provincial Community-Based Monitoring System (CBMS) Coordinating Board aron mapalig-on ang paggamit sa tukmang datos sa pagdumala sa Probinsiya sa Sugbo.
Matud sa Kapitolyo, pinaagi sa maong lupon mas mapauswag ang paghimo og mga programa ug polisiya base sa tinuod nga kahimtang sa mga komunidad. Makatabang usab kini sa hustong pagpili sa mga benepisyaryo ug mas epektibong paggasto sa pondo sa gobyerno.
Ang CBMS, nga gimando sa Republic Act No. 11315, usa ka teknolohiya nga sistema sa pagtigom, pagproseso ug pagberipika sa datos sa matag barangay aron magamit sa pagplano sa kalamboan ug pagsusi sa resulta sa mga programa sa gobyerno.
Sugod Hulyo 1, ang Provincial CBMS Coordinating Board maoy mangulo sa pagpatuman sa programa kauban ang Philippine Statistics Authority (PSA) Cebu Provincial Statistical Office. Si Gov. Baricuatro maoy chairperson, samtang ang Chief Statistical Specialist sa PSA Cebu maoy vice chairperson.
Gimandoan usab sa executive order ang mga sakop sa lupon ug mga opisina sa Kapitolyo nga motabang sa operasyon sa CBMS pinaagi sa paghatag og suporta sama sa transportasyon, komunikasyon, opisina, koordinasyon sa pondo, ug pagdumala sa mga field personnel.
Dugang pa, ang lupon adunay tahas sa pagpahibalo sa publiko bahin sa CBMS ug pag-awhag sa paggamit sa datos niini aron mas mapauswag pa ang mga programa ug serbisyo sa gobyerno alang sa katawhan.
I via Renante Socia Lada