Patay ang usa ka 5-anyos nga bata, samtang luwas na ang duha pa ka bata human sa insidente sa pagkalumos sa Angasil, Lapu-Lapu City niadtong Biyernes, Hulyo 17, 2026.
Sa imbestigasyon, upat ka bata nga nag-edad og 4, 5, 7 ug 11 anyos ang miadto sa Angasil aron mangaligo. Ang mga bata nagpuyo sa Jensen Village, Pool, Bankal. Sa wala pa ang insidente, nagduwa pa sila sa gawas sa ilang panimalay ug wala nakabantay ang ilang mga ginikanan kay nagtuo silang nagdula ra sa duol.
Nasayran usab nga gisakay sila og motorsiklo padulong sa Angasil. Pag-abot didto, nakasulod sa lawom nga bahin sa dagat ang tulo ka bata ug nalumos.
Gidali sila og dala sa ospital apan ang 5-anyos gideklara nga Dead on Arrival (DOA). Samtang ang duha ka bata anaa na sa maayong kahimtang ug padayon nga giatiman sa mga doktor. Ang 11-anyos nilang kauban luwas ug nakauli na sa ilang panimalay.
Padayon pa ang pahimangno sa mga awtoridad sa mga ginikanan nga bantayan kanunay ang ilang mga anak aron malikayan ang susamang trahedya.
I via Renante Socia Lada