Misurprise og inspeksyon si Cebu Governor Pamela “Pam” Baricuatro sa operasyon sa quarry sa daplin sa Hinulawan River niadtong Biyernes, Oktubre 24, human madawat ang daghang reklamo gikan sa mga residente sa lugar.
Kauban sa gobernador atol sa iyang pagbisita sila si Atty. Ace Durano, Provincial Administrator; James Canoy, Chief of Staff; Ruben Licera Jr., Provincial Head for Special Projects; ug Barangay Cambang-ug Captain Manuel Madrid, nga nagtudlo kaniya sa kahimtang sa operasyon sa quarry.
Ang inspeksyon gihimo pagkahuman sa direktiba sa gobernador nga ipa-review sa Provincial Legal Office ang petition nga gisumite sa mga residente sa Toledo City kaniadtong Oktubre 15. Ang maong pito-ka-panid nga petition naglakip sa mga reklamo sa mga kababayen-an, mag-uuma, mangingisda, ug gagmay’ng sand extractors nga nag-ingon nga padayon gihapon ang quarrying bisan pa adunay moratorium.
Sumala sa mga residente, tungod sa walay kontrol nga pagkuha sa balas ug graba, nawad-an na og porma ang suba, nagkalapad ug nagkalalom, nga naglisod na ang mga tawo sa pagtabok kay walay tulay sa lugar. Giingon pa nila nga mas peligroso kini kon adunay kusog nga ulan o baha.
Gipadayag usab sa grupo nga dili patas ang pagpatuman sa balaod kay samtang ang gagmay’ng magkuha’g balas dakpon, ang dagkong operator kuno padayon lang sa ilang kalihukan.
Sa iyang bahin, mitutok si Gob. Baricuatro nga kinahanglan nga mosunod sa balaod ug environmental standards ang tanang quarry ug mining operations sa lalawigan. Giila usab niya nga ang kalamboan dili dapat ikapuli sa kaluwasan sa katawhan ug kalikupan.
Source: Cebu Province PIO
I via Renante Socia Lada