Gihimo sa kapulisan sa lungsodsa Argao, ang usa ka seryosong imbestigasyon human mapatay ang usa ka truck driver sa kalit nga pagpamusil kagabii, Oktubre 24, sa Sitio Seneguelas, Upper Taloot, Cebu.
Ang biktima giila nga si Besher Romero Meñosa, residente sa Cabangahan, Consolacion, Cebu, ug driver sa usa ka kompanya. Base sa inisyal nga imbestigasyon, nag-andam na unta siya sa pagmaniho sa iyang truck sa dihang kalit lang miabot ang suspetsado nga nagsakay og puti nga motorsiklo, nagsul-ob og puti nga T-shirt ug itom nga kalo, ug namusil kaniya sa makadaghang higayon.
Human sa krimen, dali nga misibat ang suspetsado padulong sa amihanang direksyon, ug hangtod karon, wala pa kini mailhi.
Matud sa hepe sa Argao Police, padayon ang ilang follow-up operation ug backtracking sa CCTV footage aron masuta ang agianan sa getaway sa suspetsado ug matino ang motibo sa pagpamusil.
Gihangyo usab sa kapulisan ang mga residente sa dapit nga makig-coordinate kung aduna silay nakita o nadungog nga makahatag og kasayuran nga makatabang sa imbestigasyon.
I via Renante Socia Lada